مشهد نادر ف السما.. وجه مبتسم من كوكبين وهلال يوم 25 أبريل الجاي
في ظاهره فلكيه مش هتتكرر كتير، هتشهد السما فجر يوم 25 أبريل 2025 حاجه غريبه وجميله في نفس الوقت، واسمها “الاقتران الثلاثي”، وده لما بيظهر كوكب الزهره مع كوكب زحل ومعاهم الهلال، وكلهم بيترتبوا بطريقه تخليهم شبه وش إنسان بيضحك، على حسب اللي قالته وكالة الفضاء الأمريكيه “ناسا”.
الدكتور أشرف تادرس، استاذ الفلك، قال إن التلات أجسام السماويه دول هيظهروا مع بعض الساعه 4:40 الصبح، واللي يقدر يبص عليهم ف الاتجاه الشرقي هيشوف القمر ف النص، فوقه كوكب الزهره، وتحته كوكب زحل. وبيستمر المنظر ده لحد ما نور الشمس يعلي ويخليهم يختفوا.
وأضاف كمان إن ممكن كوكب عطارد يبان في نفس اللحظه ديه جنبهم، قريب من الأفق قبل الشروق على طول، وده بيخلي المنظر أجمل وأندر.
بس في ناس فاكره إنهم هيشوفوا فعلاً وش بيضحك زي اللي ف الصور اللي بتتشارك على النت، وده مش حقيقي على طول الخط.
الدكتور وضح إن الشكل ده ما بيظهرش في مصر، لكن ممكن يتشاف في أمريكا أو في بلاد الشرق زي آسيا، وكمان بيكون ميل شويه، وكوكب زحل بيكون نوره ضعيف مقارنة بالزهره.
اللي عنده تلسكوب بسيط أو منظار فلكي، هيستمتع أكتر بالمشهد، لكن حتى من غيرهم، تقدر تشوفه لو كانت السما صافيه ومفيش سحاب.
