هيئة الدواء تكشف عن أضرار الإفراط في أكل الفسيخ والرنجة في العيد
كشفت هيئة الدواء المصريه عن أضرار كبيرة قد تنتج عن الإفراط في تناول الفسيخ والرنجة، خصوصًا مع حلول عيد الفطر.
وقالت الهيئة إنه رغم الطعم اللذيذ للفسيخ والرنجة، إلا إنهم ممكن يتسببوا في مشاكل صحية خطيرة.
أول الأضرار اللي ممكن تحصل هو ارتفاع ضغط الدم، لأن الفسيخ والرنجة مليانين أملاح بترفع الضغط بشكل كبير، وده بيشكل خطر على الأشخاص اللى عندهم مشاكل في الضغط.
كمان الجهاز الهضمي مش في مأمن، لأنه بعد تناول الأسماك المملحة هتحس بانتفاخ ومشاكل في المعدة، والمعدة ممكن تتأثر بالحموضة اللى تتحول فيما بعد إلى نزلة معوية حادة.
ومن الأعراض التانية اللي ممكن تظهر هو ضيق التنفس، خصوصًا لو كانت الأسماك المملحة فاسدة، لآنها ممكن تسبب صعوبة في التنفس وتخليك تحس وكأنك مختنق.
الأسوأ من ده كله، هو الإصابة بمرض البتيوليزم، اللى بيهاجم الأعصاب وبيسبب مشاكل زي ازدواج الرؤية وصعوبة الكلام وضعف الأطراف العليا للجسم.
وفي الحالات الشديدة ممكن يحصل فشل في التنفس لدرجة الوفاة.
هيئة الدواء نصحت بتوخي الحذر عند تناول الفسيخ والرنجة، وأكدت على ضرورة التأكد من جودتها وطريقة حفظها علشان نتجنب أي أضرار صحية قد تحدث.
