صحفي إسباني يقارن شخصية مبابي وفينيسيوس ويثير الجدل بين جماهير مدريد
الصحفي الإسباني خوليو بوليدو طلع بتصريح مثير للجدل عبر إذاعة كادينا سير، واللي فيه قارن بين شخصية نجم باريس سان جيرمان كيليان مبابي، ولاعب ريال مدريد فينيسيوس جونيور، وقال كلام خلا جماهير الملكي تنقسم من جديد.
بوليدو قال: “شخصية مبابي مثاليه جداً لريال مدريد، واللي بقوله ده مش رأيي لوحدي، ده فيه كتير من جماهير مدريد بدأت تتعب من تصرفات فينيسيوس والضجيج اللي دايمًا حواليه.”
وأضاف إن مبابي بيتميز بهدوئه واتزانه داخل وخارج الملعب، على عكس فينيسيوس اللي دايمًا بيكون مثير للجدل سواء بردود أفعاله أو احتفالاته.
الكلام ده فتح نقاش كبير على السوشيال ميديا، خصوصاً بين اللي شايفين إن فينيسيوس لاعب موهوب وله دور كبير في انتصارات الريال، وبين اللي شايفين إن مبابي هو النموذج اللي محتاجه الريال في المرحلة الجاية.
البعض اعتبر إن بوليدو بيحاول يمهد لتواجد مبابي في مدريد، خصوصاً مع الأخبار اللي بتتكرر عن قرب انتقاله وفي نفس الوقت، فيه ناس شايفين إن المقارنة دي غير عادلة، لأن كل لاعب له طبيعته وشخصيته.
وفي ظل كل الجدل ده، لسه الجمهور مستني يشوف هل فعلاً مبابي هيكون لاعب ريال مدريد الجاي؟ ولا فينيسيوس هيقدر يثبت إن شخصيته مش عائق، بل مصدر قوة؟
