ريال مدريد يعلن إصابة كامافينجا وغيابه عن الكلاسيكو والبطوله
أعلن نادي ريال مدريد الإسباني بشكل رسمي تفاصيل إصابة لاعبه الفرنسي إدواردو كامافينجا، اللي اتعرض ليها في مباراة خيتافي أمس ضمن الدوري الإسباني.
كامافينجا اتصاب قبل نهاية الماتش بدقايق، بعد تدخل قوي على قدمه من لاعب خيتافي، وسقط على الأرض وخرج من الملعب مصاب.
الريال فاز في الماتش ده بهدف مقابل لا شيء، لكن الإصابة دي جت في توقيت صعب جدًا، خصوصًا وإن الفريق بيستعد يواجه برشلونة يوم السبت الجاي في نهائي كأس ملك إسبانيا.
وفي بيان رسمي، قال ريال مدريد إن اللاعب عمل فحوصات، وتبين إنه عنده تمزق كامل في وتر العضله المقربه في رجله اليسرى، واللي بتحتاج علاج وفترة تأهيل طويلة.
ورغم إن النادي مقلش مدة الغياب بشكل دقيق، إلا إن الصحف الإسبانيه أكدت إن موسم كامافينجا انتهى خلاص، وهيغيب على الأقل 3 شهور، يعني مش هيلعب في الكلاسيكو ولا حتى كأس العالم للأنديه في أمريكا.
خسارة كبيره لريال مدريد في توقيت حرج، وصدمة للجمهور اللي كان مستني يشوف الفريق بكامل نجومه في النهائي.
