راشفورد عايز برشلونة ومانشستر متمسك بالسعر وبرشلونة مش ناوي يدفع

راجت تقارير إنجليزيه النهارده الخميس، بتأكد إن ماركوس راشفورد نجم مانشستر يونايتد واللي حاليا مُعار لأستون فيلا، عايز يسيب إنجلترا ويروح يلعب في برشلونة بالصيف الجاي بس المشكله الكبيره دلوقتي هي الفلوس.

التقارير بتقول إن مانشستر يونايتد حاطط سعر 40 مليون جنيه إسترليني علشان يوافق يبيع راشفورد، لكن برشلونه مش ناوي يدفع المبلغ ده، خصوصًا مع أزماته الماليه المعروفه ومشاكل اللعب المالي النظيف اللي لسه مأزماه.

راشفورد نفسه باين عليه متحمس جدًا للانتقال، وبيقولوا إن ده بسبب إنه عايز تجربه جديده في الكامب نو، وطريقه لعب مختلفه، وكمان اسم برشلونه اللي ليه هيبته.

بس لو النادي الكتالوني فعلاً مش هيدفع الرقم المطلوب، ممكن يضطر يسيب راشفورد ويدوّر على مهاجم تاني يكون أرخص، يناسب ميزانيته اللي مش مساعداه.

لسه المستقبل مش واضح، بس أكيد الأيام الجايه هتوضح إذا كانت الصفقة هتتم ولا لأ، خصوصًا مع اقتراب فترة الانتقالات.